17.08.2016 15:20

Дашкольнік можа перанесці рэспіраторную інфекцыю і 8 разоў на год, школьнік – у сярэднім да 4-х. Найбольш часта ад вострых рэспіраторных вірусных захворванняў і звязаных з імі ўскладненняў (сінусітаў, бранхітаў, пнеўманій) пакутуюць дзеці да 3 гадоў. Іх надта слабы імунітэт гэтаму вельмі спрыяе.

Прычына бед
– Задача бацькоў – зрабіць усё, каб дзеці раслі моцнымі, трывалымі, здольнымі процістаяць самым розным шкодным уздзеянням, у тым ліку захворванням, – кажа загадчыца 2-га педыятрычнага аддзялення 3-й гарадской дзіцячай клінічнай паліклінікі г. Мінска Святлана Дзяруга. – Тых жа вострых рэспіраторных захворванняў шмат – «дзякуючы» мноству вірусаў (грыпу і парагрыпу, рынавірусам, адэнавірусам, рэспіраторна-сінцытыяльным, энтэравірусам і г.д.), якія пранікаюць у арганізм паветрана-кропельным шляхам, а таксама бактэрыям (стрэптакокам, менінгакокам, стафілакокам, энтэракокам і інш.), якія «пражываюць» у верхніх аддзелах дыхальных шляхоў. Хворы чхнуў, мы ўдыхнулі, вірус трапіў на слізістую і пачаў актыўна размнажацца ў выдатных для сябе ўмовах. Парушэнні, якія ўзнікаюць далей у верхніх дыхальных шляхах, спрыяюць таму, што бактэрыі з лёгкасцю пранікаюць глыбей і заяўляюць аб сабе запаленнем.

Дзецям не шанцуе пры сутыкненні з вірусам ўдвая. Па прычыне фізіялагічных асаблівасцяў: памер органаў дыхання невялікі, насавыя ходы вузкія, слізістая далікатная, з вялікай колькасцю сасудаў. Дастаткова невялічкага запалення, і дзіця ўжо дыхае ротам.

Органы дыхання дзіцяці актыўна развіваюцца, а любое захворванне цяжка пашкоджвае тканкі і органы, якія растуць.

Пахадзі... басанож
У незагартаваных дзяцей нават умеранае ахалоджванне зніжае ўстойлівасць арганізма да вірусаў і бактэрый. Умацаваць ахоўныя сілы могуць правільны догляд ад нараджэння, рацыянальнае харчаванне, фізічнае выхаванне, загартоўка.

Першай холадавы «ўдар» прымае на сябе скура, яна перадае «сігнал» глыбей – змяняецца ток крыві і лімфы, узмацняецца ўтварэнне слізі ў верхніх дыхальных шляхах. Застой крыві і лімфы, вялікая колькасць слізі актывізуюць мікробы, якія да гэтага часу паводзілі сябе досыць мірна. Загартаванае дзіця лёгка спраўляецца з такімі зменамі, незагартаванае хварэе.

Калі не выпрацаваць у дзіцяці ўстойлівасці да холаду, яно будзе прастуджвацца пастаянна.

Загартоўку трэба пачынаць з першых дзён жыцця:

• нельга празмерна ўхутваць;
• зрабіць нормай паветраныя ванны і прагулкі на свежым паветры;
• летам прывучваць хадзіць басанож па пяску, траве (у халаднаватае надвор'е, восенню і зімой хадзіць басанож у памяшканні);
• дадаць водныя працэдуры: паласканні гартані, мясцовыя і агульныя вільготныя абціранні, абліванні ступняў, купанне ў басейне, чыстым вадаёме, кантрасны душ;
• паласкаць горла раніцай і ўвечары такім растворам: 1 г солі + 0,5 г соды на шклянку вады тэмпературай 27-28 градусаў. Тэмпературу раствору паступова паніжаць — праз 2-3 дні на 1 градус;
• заахвоціць да заняткаў фізкультурай. Гэта ўмацоўвае мышцы, павялічвае карысны дыхальны аб'ём лёгкіх, спрыяе нармальнаму насавому дыханню, а ўсё гэта разам павышае супраціўляльнасць арганізма;
• даваць больш садавіны, гародніны, зяленіва і сокаў. Чыпсы і макарона хуткага гатавання — не атрута, але не норма. Норма — гэта баланс паміж бялкамі, вугляводамі і тлушчамі, зніжэнне каларыйнасці за кошт жывёльных тлушчаў і цукру, дадаванне ў рацыён прадуктаў, багатых на вітаміны і мікраэлементы.

Свая талерка
Самае важнае — пазбяганне кантактаў з хворымі. І хоць ва ўмовах садка ці школы такая рэкамендацыя здаецца, мякка кажучы сумніўнай, трэба прадугледзець некаторыя ахоўныя меры хоць бы дома. Каб інфекцыя не «паваліла» ўсю сям'ю.
Правілы хатніх паводзінаў вельмі простыя:

• хворы закрывае нос і рот падчас чхання і кашлю, яму вылучаюць асобны посуд, ручнік, насоўкі;
• здаровыя носяць марлевыя павязкі; праветрываюць пакоі 3-4 разы на дзень па 15-20 хвілін (летам вокны неабходна трымаць адчыненымі ўвесь дзень); робяць вільготную прыборку пры адчыненых вокнах, бо разам з часцінкамі пылу ў паветра ўзнімаюцца і вірусы з мікробамі.

Фітатэрапія і масаж
Дзецям, якія часта пакутуюць ад вострых рэспіраторных захворванняў, урач можа рэкамендаваць фітатэрапію (корань салодкі, эўкаліпт, календулу, экстракты радыёлы, элеўтэракоку, настоі заманіхі, эхінацыі, лімонніку кітайскага, араліі, кораня жэньшэню, прапалісу, якія стымулююць актыўнасць клетак імуннай сістэмы). Прымяняюць інгаляцыі, святлолячэнне, масаж, спелеатэрапію.

zviazda.by