25.02.2015 14:24

З 12 пераможцаў конкурсу эсэ, прысвечанага 70-годдзю Перамогі савецкага народа у Вялікай Айчыннай вайне, 10 — менавіта вучні вясковых школ. Па меркаванні арганізатараў, гэта можна патлумачыць тым, што у вёсцы мацнейшая сувязь паміж пакаленнямі. Сямейныя гісторыі там жывуць больш працягла, а гэта значыць, што інфармацыя пра вайну трапляе да падлеткаў ні з Інтэрнэту ці кніг, а непасрэдна ад яе ўдзельнікаў, адзначыў дацэнт кафедры журналістыкі, кандыдат філалагічных навук Мікалай Караткоў.

Конкурс эсэ праводзіўся на пачатку 2015 года кафедрай журналістыкі МДУ імя А. А. Куляшова сумесна з упраўленнем ідэалагічнай працы, культуры і па справах моладзі Магшлёўскага аблвыканкама. Ад удзельнікаў патрабавалася не толькі апісаць падзеі Вялікай Айчыннай вайны, але і асэнсаваць іх з пункту погляду сучаснасці. Вынікі конкурсу, у якім прынялі ўдзел амаль 130 вучняў з абласнога цэнтра і ўсіх раёнаў Магілёўшчыны, былі падведзеныя 21 лютага ва ўніверсітэце.

«Асабліва ўсцешвае тое, што большасць эсэ фіналістаў і пераможцаў конкурсу заснаваныя на сямейных гісторыях — вучні, у прыватнасці, распавялі пра тое, як іх родныя перажылі вайну. Многія напісалі пра дзядуль і бабуль, якія вызвалялі Беларусь ад ворага ў 1944 годзе. Да эсэ прыкладаюцца фотаздымкі, успаміны, якія могуць мець цікаўнасць для краязнаўцаў і гісторыкаў», — заўважае суразмоўца.

Па словах Мікалая Караткова, большасць канкурсантаў адлюстравала вайну без лішняга пафасу, праўдзіва і эмацыянальна. «Гэта вайна, калі можна так сказаць, з чалавечым тварам, — удакладніў ён. — Мяркую, праз некалькі тыдняў некаторыя з дасланых на конкурс эсэ з’явяцца на афіцыйных сайтах нашага ўніверсітэта і Магілёўскага аблвыканкама. Папярэдняя дамоўленасць у нас ужо ёсць. Пазнаёміцца з работамі школьнікаў Магілёўшчыны атрымаюць магчымасць усе жадаючыя».

Ред.