21.09.2015 14:17

У Цэнтральнай гарадской бібліятэцы ім. К.Маркса ў рамках творчага праекта «Арт-окно как объект культурного пространства библиотеки» сярод навучэнцаў бібліятэчнага каледжа імя А.С. Пушкіна адбылася прэзентацыя аконнай выставы аршанскага мастака-графіка Паўла Сідаровіча пад назвай «ЛітаразнаЎства». Яна прысвечаны беларускаму алфавіту.

У аснове праекта — чорна-белая плакатная графіка. Для кожнай літары створана мастацкая кампазіцыя, у якой мастак выкарыстоўвае прадметы і сімвалы, якія пачынаюцца на гэтую літару. Злучным звяном з’яўляецца сімвал чалавека, якога мастак жартаўліва назваў Хлопчык. Кожны малюнак суправаджаецца тлумачальным надпісам з ужываннем слоў, якія выкарыстоўваюцца ў дадзенай кампазіцыі.

Серыя налічвае 34 творы, што адпавядае колькасці літар у беларускім алфавіце. Прапанаванай канцэпцыяй мастак не толькі сам разважае пра беларускую мову і беларускую культуру, але і наводзіць на разважанні гледача.

Выстава будзе працаваць да 28 верасня.

Мастак Павел Сідаровіч нарадзіўся ў 1979 годзе. Скончыў Аршанскі механіка-тэхналагічны тэхнікум (зараз Аршанскі механіка-эканамічны каледж) па спецыяльнасці эканаміст. У 2004 годзе пачаў сур’ёзна займацца выяўленчым мастацтвам. Актыўную выставачную дзейнасць вядзе з 2012 года. З 2014 года з’яўляецца членам Аршанскага гарадскога народнага клуба самадзейных мастакоў «Рэнесанс».

Удзельнік калектыўных, абласных, рэспубліканскіх і міжнародных выстаў. Вядомы як стваральнік персанальных канцэптуальных праектаў.

Творчая дзейнасць: плакатная графіка, трафарэтны жывапіс, графіка алоўкам, арт-аб’екты.

Рэд.