Што можа адарваць сучасных дзяцей ад экранаў камп’ютараў і мабільных тэлефонаў, вярнуць з віртуальных зносін да зносін у рэальным часе і ў рэальным жыцці? На мой погляд, толькі штосьці казачнае, чарадзейнае, незвычайнае.

19 студзеня 2017 года ў сценах дзяржаўнай установы агульнай сярэдняй адукацыі «Сярэдняя школа № 31 г. Магілёва» прайшоў міні-фестываль батлеечнага мастацтва «Нашы нябёсы». Амаль што кожны шасцікласнік прыняў актыўны ўдзел у падрыхтоўцы гэтага святочнага мерапрыемства. Хтосьці майстраваў лялькі, хтосьці вучыў ролі, маляваў афішы. А вучань 6 «Б» класа Емельянаў Глеб разам са сваімі бацькамі нават змайстраваў уласную батлейку.

Падрыхтоўчая работа завяршылася, і цуд пачаўся. Кожны маленькі калектыў па-свойму імкнуўся перадаць эмоцыі, светаадчуванне і светаўспрыманне каляднай батлеечнай п’есы «Цар Ірад». Перад гледачамі адбывалася сапраўднае чарадзейства: лялькі ажывалі ў руках таленавітых акцёраў.

Батлейка — найлепшы спосаб навучыць дзяцей простым, правільным і надзейным жыццёвым арыенцірам: веры, надзеі і любові.

Шэндарава І.С.,
настаўнік беларускай мовы і літаратуры
дзяржаўнай установы агульнай сярэдняй адукацыі
«Сярэдняя школа № 31 г. Магілева»